Real Madridi u mundua shumë për të marrë një barazim zhgënjyes 1:1 kundër Gironës të dielën, dhe ishte një tjetër mbrëmje frustrimi për Rodrygo Goes.

24-vjeçari u aktivizua si zëvendësues në pjesën e dytë në Montilivi dhe, përveç një momenti kur pothuajse fitoi një penallti në fund, ai sërish pati vështirësi të linte ndikim në lojë.

Ka qenë një sezon i vështirë për Rodrygon, i cili ka vetëm një asistim në 12 ndeshje për Real Madridin në të gjitha garat.

Ai ende nuk ka gjetur rrugën e rrjetës, me golin e fundit që daton që nga muaji mars (kundër Atletico Madridit në Ligën e Kampionëve).

Tani janë bërë 30 ndeshje që nga ajo natë në “Bernabeu”. Në këtë periudhë, Rodrygo ka luajtur 1,339 minuta. Statistika e parë është goditëse për brazilianin, pasi tani e ka barazuar si sulmuesi i Real Madridit me serinë më të gjatë pa gol në historinë e klubit, sipas 2010MisterChip.

Rafa Marañón e mbante më parë këtë rekord, pasi kishte 29 ndeshje pa gol në vitin 1970. Megjithatë, ai kishte luajtur 1,426 minuta gjatë asaj periudhe, ndaj Rodrygo ende nuk e ka kaluar këtë shifër, çka tregon se Xabi Alonso e ka përdorur kryesisht nga stoli. Megjithatë, ai tani ka arritur në 30 ndeshje pa gol, njësoj si Mariano Diaz, i cili pati një seri prej 986 minutash.

Kriza e golave për Rodrygon vjen në mes të spekulimeve për të ardhmen e tij tek Real Madridi. Ai mbetet në radarin e disa skuadrave të Premierligës, të cilat do të ishin të interesuara ta marrin në vitin 2026.

Për momentin, lojtari vetë mbetet i përkushtuar ndaj Real Madridit, megjithatë, për të siguruar qëndrimin e tij, ai duhet të përmirësojë dukshëm efektivitetin në zonën ofensive. Edhe pse po e ka të vështirë të hyjë në formacionin titullar, sa herë që është në fushë, ai e di se duhet të japë shumë më tepër.